[購買] 本地 印象交易所 香港有格 珪藻土吸水杯墊 ｜樓下公園遊樂場

記唔記得小學雞小息，有隻game叫何仔公？上捉上、下捉下，有隔牆、冇穿針。嘖，學校入面邊得嚟咁多上下隔牆吖？你估隔籬公園仔有瀡滑梯繩網陣咩？不過規則玩開都會照跟，咪就靠地下啲階磚囉！「哦唔同色你捉我唔到」，小息遊戲已經有國界嘅概念，其實我哋細個都行前世界幾多。
 
講笑啫！其實香港人，咪就係貪玩咋嘛，由細到大。不過時代變，地方變，連細路哥玩嘅地點同遊戲，亦跟住進化變遷。但當中少數冇點變又見證一切嘅，大概都係有佢，「格仔」呀！
 
 𡃁仔冇咩多，多精力，日日追嚟追去，放學做完功課落樓下玩已經係每日最期待嘅大事：伏喺紙皮石牆上數123，「過馬路要小心」，但再唔小心都唔使罰一千幾百。「樓下」唔使有機動遊戲，但嗰份一大班人一齊玩嘅簡單已經好滿足；後嚟大啲，去完秋季旅行可能會同同學喺公園仔「下半場」玩埋啲on9 game，然後入夜「加時」，最friend嗰幾個喺韆鞦架、瀡滑梯頂匿埋傾心事，會笑、會喊，心情隨住一格格膠墊上嘅樹影搖曳。可能嗰晚喺「公園」先第一次發現，由磚仔到地墊，大咗，唔一定就會硬淨咗；到再大啲，開始做嘢終於經濟自由，出完糧同身邊嘅人買飛入主題樂園，有水牌地圖，一格格教你點行，但一兩三次興奮過後，你可能排住隊都未必對一陣坐嘅過山車有太大感覺。平時，仲坐唔夠咩？喺「遊樂場」嘅toilet洗手時，你見到鏡入面有條白頭髮，然後突然有啲明以前聽過嘅一句說話：娛樂愈嚟愈多，但快樂愈嚟愈少。
 
細個顧住「玩」，大咗先怕「完」。
 
由一大班人，變成圍內朋友，剩返三五知己，就好似取材靈感：南山邨樓下公園遊樂場仔個飛行棋盤，人去樓空、各散東西。This was our playground，但至少仲可以好好記住，天地曾經歡樂、冒險都算樂園，我哋，總算一齊流過身汗。
 
然後無論走得再遠
「何咗呀，幫手解一解吖喂」
「OK！」

印象交易所，希望成為一個交易所有關於香港印象嘅產品、一個香港製造嘅平台，將海馬體變成實體，將今日留低。印象就係客觀事物刺激你嘅感官後，喺腦入面嘅海馬體留低嘅記憶。印象，可以深、可以淺，可能隨住時間變得模糊，不知不覺消失得無影無蹤。為咗保留甚至延續呢啲屬於我哋香港人嘅印象，我哋想將日常所見所感、融入生活百物之中，留低屬於呢個地方、呢個時代嘅生活、文化同記憶。

印象，其實唔係過去式，而係現在進行式。