[購買] 本地 印象交易所 x 麥子啤酒 飲酒思源 水塘手工啤｜船灣。白蘭

每逢夏天，街邊間唔中都會傳嚟陣陣幽香，耷低頭一睇，果然有婆婆擺緊檔，一盆十零包、每包三四朵，嫩白清新，有時膠袋仲留住幾粒露珠𠻹！每一朵，都有種一聞就會諗起香港嘅味道。

白蘭花

花你可能買得多，但邊度嚟又有冇留意過？以為入口呀？No No No！白蘭花生命其實好短暫，一摘落嚟就開始倒數，通常24個鐘內就會謝，所以平日喺婆婆手上買到嘅白蘭花都係本地出産，當中，絕大部份嚟自大埔林村。介紹返吖！有700幾年歷史嘅林村，除咗許願樹，其實仲係香港嘅白蘭花之鄉。不過種白蘭花並唔係咁易㗎師傅，因為白蘭係夜間開花嘅植物，所以花農一般飯後就要落田，凌晨就要摘好出貨，都幾chur㗎。而且白蘭樹生得高，採花嗰陣、好多時仲要擒高擒低，你都咪話唔辛苦！

不過白蘭花又有個好處，就係未摘之前生命力強，就算風吹雨打、天氣再差都捱得住，所以先得到唔少林村農夫嘅青睞。亦因為咁，每年初夏至深秋嘅當造季節，我哋先可以十蚊八蚊，享受到一日充滿回憶味道嘅清香。

印象交易所，希望成為一個交易所有關於香港印象嘅產品、一個香港製造嘅平台，將海馬體變成實體，將今日留低。印象就係客觀事物刺激你嘅感官後，喺腦入面嘅海馬體留低嘅記憶。印象，可以深、可以淺，可能隨住時間變得模糊，不知不覺消失得無影無蹤。為咗保留甚至延續呢啲屬於我哋香港人嘅印象，我哋想將日常所見所感、融入生活百物之中，留低屬於呢個地方、呢個時代嘅生活、文化同記憶。

印象，其實唔係過去式，而係現在進行式。