夏日炎炎去露營最緊要有把靚風扇，如果唔係真係成晚唔使瞓 ！近日韓國品牌Claymore的多用途戶外風扇V600+深受營友愛戴，連用開血滴子的小編都諗梗要唔要轉會。都係個句：為免買錯，要試清楚。所以小編決定實測兩把風扇的各項功能，等各位用家可以考慮清楚。

一把好風扇最緊要風力夠勁，小編以風速計量度兩把風扇的風力，30 cm外的測試數字血滴子為1.8 m/s，Claymore V600+為2.8 m/s，Claymore V600+略勝一籌。風扇除咗要夠勁，仲要夠靜，咁先適合瞓覺的時候用，但係要兩者兼得並唔容易。血滴子和Claymore V600+兩者係靜音方面都表演出色，而數據上，Claymore V600+稍勝。

使用方面，Claymore V600+為吊扇及自立兩用，配備一支輕便三腳架，即使係金仔營用家，用唔到吊扇都可以考慮Claymore。自立式設計方便搬位，可以去到邊涼到邊。另外，Claymore的充電時間只需4小時，比起血滴子的16小時大大減少。
結論：Claymore V600+各項主要性能都稍勝血滴子，但在重量、尺寸及價格方面就輸一大截。即使受到Claymore V600+的挑戰，小編認為血滴子依然有一定吸引力。